MARAK LAUK
Ku: H. Dede Asy’arie
TIHEULA waktu rek ngahadiran ondangan Walimatussyafar dulur anu deuk miang umroh di Ciranjang. Waktu ngaliwat Tungturunan, memeh sasak Cisokan, katingali aya sababaraha gantungan lauk tagih mani baradag.
“Kacipta mun dipais nya?,“ ceuk adi nu lalaki. “Abdi mah emut waktos ngajaring di Citarum sareng Mang Yayat tea harita kenging lauk lika tea geuning,” ceuk adi nu hiji deui.
Atuh asa kasuat-suat deui. Langsung we ngadongengkeun waktu keur marak di Citarum waktu keur disaatan da harita teh keur nyieun bendungan Cirata tea. Waktu harita, meunang lauk lika, teu gede, ukur opat ramo. Ku Mang Yaya (tos almarhum ayeuna mah), nu kabagean ngaliwet, si lauk teh dipotongan jadi lima keureut, bari terus dibaluran ku uyah.
Waktu liwet mimiti saat, lauk lika nu meunang ngeureutan teh ditunda luhureun daun cau nu dipake nutupan liwet bari terus dikekeb ku turub kastrol. Da eta mah waktu liwet asak, daging lauk nu lima keureut tadi robah warna jadi koneng. Liwet didaraykeun luhureun daun cau meunang meresihan. Deungeuna ukur lima keureut lauk lika tadi, nya ukur pada nyiwitan we da kudu walatra tea.
“Atuh gantung areuyeun meureun nya,” ceuk Asep Ruslih bari nangtung rek ngahurungkeun lampu da karasa poek.
Enyaan pisan tateh, daang liwet sakastrol ku sapuluh urang, karasana ukur saketap, tapi ni’mat naker, da saumurna ge karek harita ngasaan ngeunahna lauk lika ti Citarum. “Ari harita ngala laukna di tua atawa di jaring,” ceuk Man Suparman panasaran. Lantaran ceunah kalolobaanana jaman harita sok ngala lauk teh di tua atawa make Endrin. “Leuheung keneh ari ditua mah ieu mun geus make endrin nepika paraeh jeung endog-endogna pisan,” ceunah mani ngageuri. “Dijaring atuh piraku deui jeung make endrin pan kaasup pecinta alam nu ngarala lauk harita teh,” cekeng.
Ceuk Man Suparman keneh, jaman keur budak mah mun hayang lauk teh cukup ku kokodok. Ukur mawa lambit atawa ayakan minangka pakakas nu dibawana teh. Ti jam salapan isuk nepika jam satu ge cenah satengah ember mah tara kurang. “Nya timimiti hurang, beunteur, sepat siem, bogo, lele, kalan-kalan sok meunang luk emas, kalolobaana mah sok lauk mujaer,” ceuk Man Suparman mani siga nu jauh panineungan.
Mun teu kitu ceunah, nyieun kokombongan leutik, terus dihalangan ku babatuan nu aya di susukan, diantep we sapeuting. “Isukna geus pinuh ku lauk eta kokombongan teh,” ceunah bari nyaritakeun deui pangalaman ngala lauk waktu keur budakna.
Aya deui cenah cara ngala lauk jaman harita, nyaeta nawu susukan nu geus dibendung. Mun cai susukan meh saat geus katingali tingkucibekna rupa-rupa lauk susukan. “Terus bari liliwetan eta teh, deungeunna mah jeung beuleum lauk meunang ngala tadi tea we!!,“ Man Suparman nyaritana mani semu kumetap, kacipta meureun pedo jeung ni’matna liwet jeung beuleum lauk harita.
“Moal bisa kalaman deui sigana mah pa haji, da duka kamarana laukna ge ayeuna mah,” ceuk Asep Ruslih bari ngetruk-ngetruk ududeun. “
Da eta diraruksak ku urang-urang keneh atuda. Coba we mun teu dituar, disangkalim. Mun teu disangkalim diendrin. Aya deui nu ngala laukna make setrum, atuh beak tepika ndog-endogna ge,” ceuk Man Suparman mani siga nu keuheul pisan.
Matak cenah pantes mun barudak loba nu teu apaleun nu kumaha rupana jeler, nu kumaha rupana kehkel, julung-julung, paray, jeung sabangsana. Enya pisan omongan Man Suparman teh, kaalaman pisan ku sorangan ditanyakeun kunu jadi anak, nu kumaha ceunah ari ngaran jeler teh?. Emh, deudeuh teuing barudak jeung turunan urang engke. Boa- boa nu ngaran laukna ge engke mah ukur aya dina gambar atawa dina carita wungkul. Wallohu’alam bisshowab. Wassalam!. (*)